ក្រុមឈ្មួញនាំចូលទំនិញចាប់ហួយ និងទំនិញច្រើនប្រភេទទៀត ក៏ដូចជាបន្លែផ្លែឈើពីខេត្តកោះកុង ឆ្លងកាត់ផ្លូវជាតិលេខ ៤៨ ចូលមករាជធានី ភ្នំពេញ បានឲ្យដឹងថា ក្រុមមន្ត្រីនគរបាលប្រឆាំងបទ ល្មើសសេដ្ឋកិច្ចខេ ត្តកោះកុង ឈរ ជើង លើកំណាត់ផ្លូវជាតិលេខ៤៨ នៅតែប្រើប្រាស់រថយន្តឡង់គ្រឺស័រ ពណ៌ស១គ្រឿង ដើម្បីប្រដេញជំរិតយកលុយពីឈ្មួញដែលមិនឈប់បង់លុយតាមការកំណត់។ បើទោះបីឈ្មួញនាំចូលទំនិញបង់ពន្ធគយនៅច្រកព្រំដែននិងច្រកកំពង់ផែក្នុងខេត្តកោះកុង តាមច្បាប់កំណត់រួចហើយក៏ដោយ ក៏ត្រូវតែបង់លុយក្បាលរថយន្តឲ្យលោក មីន រស្មី និងមន្ត្រីក្រោមឱវាទមិនអាចខកខាននោះឡើយ។ ដូច្នេះហើយទើបឈ្មួញអត់ធ្មត់តទៅទៀតលែងបានក៏លាតត្រដាងរឿងអាស្រូវពុករលួយប្រើអំណាចហួសព្រំដែនរបស់លោក មីន រស្មី ស្នងការរងនគរបាលខេត្តកោះកុង ជាបន្តបន្ទាប់ដើម្បីឲ្យថ្នាក់ដឹកនាំក្រសួងមហាផ្ទៃ និងអគ្គស្នងការនគរបាលជាតិ បានដឹងបានឮហើយចាត់វិធានការទប់ស្កាត់ជាបន្ទាន់។ ជាពិសេសនាយឧត្តមសេនីយ៍ នេត សាវឿន អគ្គស្នងការនគរបាលជាតិ មិនគួរបណ្ដែតបណ្ដោយឲ្យលោក មីន រស្មី ធ្វើអ្វីៗតាមអំពើចិត្តទៀតទេព្រោះនាំឲ្យប៉ះពាល់ដល់កេរ្តិ៍ឈ្មោះស្ថាប័ននគរបាលជាតិទាំងមូល។
ប្រភពពីមន្ត្រីនគរបាលនៅក្នុងស្នងការដ្ឋាននគរបាលខេត្តកោះកុង មួយចំនួនបានឲ្យដឹងថាថ្មីៗនេះរឿងអាស្រូវពុករលួយនិងទង្វើមិនប្រក្រតីរបស់លោក មីន រស្មី ស្នងការរងនគរបាលខេត្តកោះកុង ទទួលផែននគរបាលប្រឆាំងបទល្មើសសេដ្ឋកិច្ច ត្រូវបានបើកកកាយជាបន្តបន្ទាប់យ៉ាងណាក៏ដោយ ក៏លោក មីន រស្មី នៅតែធ្វើអ្វីៗតាមអំពើចិត្តរបស់ខ្លួន។ ប្រភពបានឲ្យដឹងថាលោក មីន រស្មី និងបក្ខពួកនៅតែគាបយកលុយពីក្រុមឈ្មួញដឹកជញ្ជូនទំនិញក្នុងខេត្តកោះកុង ដោយឥទ្ធិពលឪពុករបស់ខ្លួនឈ្មោះ យន្ត មីន អភិបាលខេត្តព្រះសីហនុ ដែលចាំកាងចាំការពារគ្រប់ពេលវេលា។ សូម្បីតែលោក សំឃិត វៀន ស្នងការនគរបាលខេត្តកោះកុង ក៏បណ្ដែតបណ្ដោយឲ្យលោក មីន រស្មី ធ្វើអ្វីៗតាមអំពើចិត្តដែរព្រោះរហូតមកដល់ពេលនេះថ្នាក់ដឹកនាំក្រសួងមហាផ្ទៃ និងនាយឧត្តមសេនីយ៍ នេត សាវឿន អគ្គស្នងការនគរបាលជាតិ ធ្វើមិនដឹងមិនឮអ្វីទាំងអស់?។
ក្រុមឈ្មួញដែលនាំចូលទំនិញពីប្រទេសសៀមតាមច្រកព្រំដែននិងច្រកកំពង់ផែក្នុងខេត្តកោះកុង ហើយដឹកជញ្ជូនឆ្លងកាត់ផ្លូវជាតិលេខ៤៨ ចូលផ្លូវជាតិលេខ៤ មករាជធានីភ្នំពេញ បានឲ្យដឹងថាមកដល់ពេលនេះកម្លាំងនគរបាលប្រឆាំងបទល្មើសសេដ្ឋកិច្ចខេត្តកោះកុង ក្រោមការគ្រប់គ្រងរបស់លោក មីន រស្មី នៅតែធ្វើសកម្មភាពគាបជំរិតយកលុយពីពួកគាត់ដូចមុនដដែល។ ប្រភពបានឲ្យដឹងទៀតថាលោក មីន រស្មី និងបក្ខពួកនៅតែដាក់កុងត្រូលជជុះត្រង់ចំណុចស្ថានីយ៍ប្រេងឥន្ធនៈយីហោ រស្មី រតនៈ លើកំណាត់ផ្លូវជាតិលេខ៤៨ ក្រុងខេមរភូមិន្ទ ខេត្តកោះកុង ដើម្បីតម្រូវឲ្យឈ្មួញបង់លុយតាមការកំណត់របស់ពួកគេ។ ក្រុមឈ្មួញដែលនាំចូលទំនិញពីប្រទេសសៀម ហើយដឹកជញ្ជូនពីខេត្តកោះកុង ចូលមករាជធានីភ្នំពេញ បានឲ្យដឹងទៀតថា ពួកគាត់ប្រឈមនឹងការលំបាកកាន់តែខ្លាំងព្រោះត្រូវលោក មីន រស្មី និងបក្ខពួកគាបយកលុយតាមរបៀបពុករលួយ។បឋម
