ប្រភពពីមន្ត្រីអាជ្ញាធរមូលដ្ឋាន ក្នុងឃុំស្រែអំបិល ស្រុកស្រែកអំបិល ខេត្តកោះកុង បានឲ្យដឹងថា អ្នកដែលធ្វើសកម្ម ភាព ទន្ទ្រានកាន់កាប់ដីព្រៃកោងកាង ក្នុងឃុំស្រែអំបិល ខ្លាំងក្លាជាង គេគឺឈ្មោះ សន សី ដែលជាអនុប្រធាន បរិស្ថានស្រុក ស្រែអំបិល។ ប្រភពបានឲ្យដឹងទៀត ថាឈ្មោះ សន សី ដែលមាន ការឃុបឃិតបើកដៃពីសំណាក់ លោក ម៉េង តិច ប្រធានបរិស្ថានស្រុកស្រែអំបិល បានជួលប្រជាពលរដ្ឋឲ្យកាប់ព្រៃកោងកាងលើកោះឡាយសំប៊ូ ទល់មុខព្រែកព្រាំង ភូមិចំការក្រោម ឃុំស្រែអំបិល ស្រុកស្រែអំបិល ដោយក្នុងមួយហិកតាទទួលបានប្រាក់កម្រៃ២០០ដុល្លារឬ៨០ម៉ឺនរៀល។ ប្រភពពីមន្ត្រីអាជ្ញាធរមូលដ្ឋានឃុំស្រែអំបិល បានឲ្យដឹងថា ការដែលលោក សន សី ហ៊ានធ្វើអ្វីៗតាមអំពើចិត្តគឺមានការបើកដៃពីសំណាក់លោក ម៉េង តិច ប្រធានបរិស្ថានស្រុកស្រែអំបិល និងពីសំណាក់លោក ម៉ម ផល្លា ប្រធានមន្ទីរបរិស្ថានខេត្តកោះកុង ផងដែរ។ ដូច្នេះលោក សាយ សំអាល់ រដ្ឋមន្ត្រីក្រសួងបរិស្ថាន មិនគួរបណ្ដែតបណ្ដោយឲ្យមន្ត្រីបរិស្ថានក្នុងខេត្តកោះកុង ធ្វើអ្វីៗតាមអំពើចិត្តទៀតទេ ព្រោះមន្ត្រីដែលជាប់ពាក់ព័ន្ធបទល្មើសទន្ទ្រានកាន់កាប់ដីព្រៃកោងកាងក្នុងឃុំស្រែអំបិល ស្រុកស្រែអំបិល ត្រូវបានបើកកកាយជាសាធារណៈរួចទៅហើយ។
ប្រភពពីប្រជាពលរដ្ឋក្នុងស្រុកស្រែអំបិល ខេត្តកោះកុង បានឲ្យដឹងថា ករណីកើតមានបទល្មើសទន្ទ្រានកាន់កាប់ដីព្រៃកោងកាងនៅក្នុងភូមិចំការក្រោម ឃុំស្រែអំបិល ស្រុកស្រែអំបិល ខេត្តកោះកុង គឺមានការឃុបឃិតបើកដៃពីសំណាក់លោក ម៉េង តិច ប្រធានបរិស្ថានក្នុងស្រុកស្រែអំបិល តែម្តង។ ប្រសិនបើគ្មានការឃុបឃិតបើកដៃពីសំណាក់លោក ម៉េង តិច ជាប្រធានបរិស្ថានស្រុកស្រែអំបិល និងជាអនុប្រធានមន្ទីរបរិស្ថានខេត្តកោះកុង ទេនោះគឺគ្មានជនល្មើសណាហ៊ានធ្វើសកម្មភាពទន្ទ្រានកាន់កាប់ដីព្រៃកោងកាងក្នុងឃុំស្រែអំបិល នាពេលកន្លងមកនោះទេ។ ទន្ទឹមនឹងនេះមន្ត្រីក្នុងមន្ទីរបរិស្ថានខេត្តកោះកុង មួយចំនួនបានឲ្យដឹងថា ការដែលលោក ម៉េង តិច ហ៊ានធ្វើអ្វីៗតាមអំពើចិត្តរបស់ខ្លួនគឺមានការសម្របសម្រួលពីសំណាក់លោក ម៉ម ផល្លា ដែលជាប្រធានមន្ទីរបរិស្ថានខេត្តកោះកុង ផងដែរទើបអ្វីៗអាចប្រព្រឹត្តទៅដោយរលូន។
ថ្មីៗនេះមានអភិបាលរងខេត្តកោះកុង ម្នាក់និងលោក ម៉ម ផល្លា ប្រធានមន្ទីរបរិស្ថានខេត្តកោះកុង បានដឹកនាំក្រុមការងារចុះទៅពិនិត្យកន្លែងកើតមានបទល្មើសទន្ទ្រានកាន់កាប់ដីព្រៃកោងកាងក្នុងឃុំស្រែអំបិល ស្រុកស្រែកអំបិល ខេត្តកោះកុង។ ក៏ប៉ុន្តែប្រតិបត្តិការនោះគ្រាន់តែធ្វើឲ្យល្អមើលប៉ុណ្ណោះ ព្រោះក្រុមការងារដឹកនាំដោយអភិបាលរងខេត្តម្នាក់ គ្រាន់តែទៅដល់កន្លែងកើតមានបទល្មើសតែមួយភ្លែតក៏វិលត្រឡប់ទៅវិញ ហើយលោក ម៉ម ផល្លា ប្រធានមន្ទីរបរិស្ថានខេត្តកោះកុង បានគេចវេះមិនបំភ្លឺដល់អ្នកសារព័ត៌មាននោះទេ។ ប្រការនេះហើយដែលធ្វើឲ្យប្រជាពលរដ្ឋក្នុងឃុំស្រែអំបិល ស្រុកស្រែអំបិល ខេត្តកោះកុង អំពាវនាវឲ្យលោកស្រី មិថុនា ភូថង អភិបាលខេត្តកោះកុង ចាត់វិធានការទប់ស្កាត់បទល្មើសទន្ទ្រានកាន់កាប់ដីព្រៃកោងកាងក្នុងឃុំស្រែអំបិល ជាបន្ទាន់ហើយមន្ត្រីដែលជាប់ពាក់ព័ន្ធគួរប្រឈមនឹងវិធានការផ្លូវច្បាប់ផងដែរ។(មានត)
