តាមប្រភពពីមន្ត្រីអាវុធហត្ថនៅក្នុងទីបញ្ជាការដ្ឋានកងរាជអាវុធហត្ថខេត្តពោធិ៍សាត់ បានឲ្យដឹងថា ក្នុងតួនាទីជាប្រធានមន្ទីរបច្ចេកទេសសម្ភារៈនៃទីបញ្ជាការដ្ឋានកងរាជអាវុធហត្ថខេត្តពោធិ៍សាត់ គឺលោក តែម ធារ៉ា មិនសូវមកបំពេញការងារនៅក្នុងការិយាល័យរបស់ខ្លួនឲ្យបានទៀងទាត់នោះទេ។ ផ្ទុយទៅវិញលោកវរសេនីយ៍ទោ(ស័ក្ដិ៍៤កន្លះ) តែម ធារ៉ា បានប្រើប្រាស់តួនាទីរបស់ខ្លួនដើម្បីប្រមូលទិញឈើនិងដឹកជញ្ជូនឈើចេញពីស្រុកវាលវែង និងស្រុកភ្នំក្រវាញ យ៉ាងពេញបន្ទុកព្រោះគ្មានមន្ត្រីជំនាញឬសមត្ថកិច្ចណាហ៊ានប៉ះពាល់ឡើយ ព្រោះគេដឹងថាមេឈ្មួញ តែម ធារ៉ា មានលោកឧត្តមសេនីយ៍ត្រី អ៊ុក សាម៉ុន មេបញ្ជាការកងរាជអាវុធហត្ថខេត្តពោធិ៍សាត់ ជាបង្អែកដ៏រឹងមាំ។ បច្ចុប្បន្នបក្ខពួករបស់មេឈ្មួញ តែម ធារ៉ា មានទីតាំងចាំប្រមូលទិញឈើនៅភូមិស្បូវរីក ឃុំលាច ស្រុកភ្នំក្រវាញ យ៉ាងសុខស្រួលហើយដឹកជញ្ជូនឈើទាំងនោះចេញពីស្រុកភ្នំក្រវាញ ចូលទីរួមខេត្តពោធិ៍សាត់ ខេត្តកំពង់ឆ្នាំង និងរាជធានីភ្នំពេញ យ៉ាងរលូន។
ប្រភពពីមន្ត្រីអាជ្ញាធរនិងសមត្ថកិច្ចក្នុងស្រុកវាលវែង និងស្រុកភ្នំក្រវាញ បានឲ្យដឹងថា បច្ចុប្បន្នមេឈ្មួញ តែម ធារ៉ា ដែលជាមន្ត្រីអាវុធហត្ថខេត្តពោធិ៍សាត់ ហើយមានតួនាទីជាប្រធានមន្ទីរបច្ចេកទេសសម្ភារៈនៃទីបញ្ជាការដ្ឋានកងរាជអាវុធហត្ថខេត្តពោធិ៍សាត់ មិនធ្វើសកម្មភាពប្រមូលទិញឈើនិងដឹកជញ្ជូនឈើដោយខ្លួនឯងដូចកាលពីមុនទៀតទេ គឺផ្អាកសកម្មភាពមួយរយៈ។ ប៉ុន្តែបក្ខពួករបស់មេឈ្មួញ តែម ធារ៉ា នៅតែបន្តសកម្មភាពប្រមូលទិញឈើនិងដឹកជញ្ជូនឈើចេញពីស្រុកវាលវែង និងស្រុកភ្នំក្រវាញ យ៉ាងពេញបន្ទុកដោយសារមានការឃុបឃិតជាមួយមន្ត្រីរដ្ឋបាលព្រៃឈើ មន្ត្រីបរិស្ថាន និងសមត្ថកិច្ចពាក់ព័ន្ធជាច្រនស្ថាប័នទៀតដែលកំពុងសប្បាយប្រមូលលុយតាមរបៀបពុករលួយ។ មានន័យថាទោះបីមេឈ្មួញ តែម ធារ៉ា ផ្អាកសកម្មភាពមួយរយៈក៏ដោយ ក៏មេឈ្មួញដែលជាមន្ត្រីអាវុធហត្ថខេត្តពោធិ៍សាត់ រូបនេះនៅតែអាចចាត់តាំងបក្ខពួករបស់ខ្លួនឲ្យធ្វើសកម្មភាពប្រមូលទិញឈើនិងដឹកជញ្ជូនឈើចេញពីស្រុកវាលវែង និងស្រុកភ្នំក្រវាញ យ៉ាងរលូនដដែលព្រោះអាងមានខ្នងបង្អែករឹងមាំ។
ប្រភពពីមន្ត្រីអាវុធហត្ថនៅក្នុងទីបញ្ជាការដ្ឋានកងរាជអាវុធហត្ថខេត្តពោធិ៍សាត់ មួយចំនួនបានឲ្យដឹងថា ដោយសារអាងមានខ្នងបង្អែករឹងមាំទើបមេឈ្មួញ តែម ធារ៉ា ហ៊ានធ្វើអ្វីៗតាមអំពើចិត្តហើយមានទំនាក់ទំនងជិតស្និទ្ធជាមួយមន្ត្រីជំនាញនិងសមត្ថកិច្ចពាក់ព័ន្ធយ៉ាងរលូនតែម្តង។ ខ្នងបង្អែករឹងមាំរបស់មេឈ្មួញ តែម ធារ៉ា ត្រូវបានគេដឹងថាគ្មាននរណាក្រៅពីលោកឧត្តមសេនីយ៍ត្រី អ៊ុក សាម៉ុន ដែលជាមេបញ្ជាការកងរាជអាវុធហត្ថខេត្តពោធិ៍សាត់ នោះទេព្រោះលោក អ៊ុក សាម៉ុន បណ្ដោយឲ្យមន្ត្រីក្រោមឱវាទរបស់ខ្លួនធ្វើអ្វីៗតាមអំពើចិត្តមិនខ្វល់ពីការរិះគន់អ្វីទាំងអស់។ ជាការពិតកន្លងមកសមត្ថកិច្ចកងរាជអាវុធហត្ថខេត្តពោធិ៍សាត់ និងសមត្ថកិច្ចអាវុធហត្ថលើផ្ទៃប្រទេស បានសហការគ្នាបង្ក្រាបបទល្មើសព្រៃឈើក្នុងស្រុកវាលវែង និងស្រុកភ្នំក្រវាញ ជាច្រើនករណីប៉ុន្តែមេឈ្មួញ តែម ធារ៉ា និងបក្ខពួកតែងតែគេចផុតពីការបង្ក្រាប។បឋម
