ប្រភពពីមន្ត្រីនគរបាលប្រឆាំងបទល្មើសសេដ្ឋកិច្ចក្នុងខេត្តព្រះសីហនុ ដែលសុំមិនបញ្ចេញឈ្មោះបានឲ្យដឹងថា គ្មានសមត្ថកិច្ចណាហ៊ានប៉ះពាល់ឧកញ៉ា ទៀ វិចិត្រ និងក្មួយប្រុសឈ្មោះ ឌី ដែលកំពុងល្បីល្បាញខាងនាំចូលប្រេងសាំងគេចពន្ធនិងទំនិញគេចពន្ធយ៉ាងពេញបន្ទុកនោះឡើយ។ ប្រភពបានឲ្យដឹងទៀតថា ជារៀងរាល់យប់ឧកញ៉ា ទៀ វិចិត្រ បានបញ្ជាឲ្យមនុស្សរបស់ខ្លួនដឹកជញ្ជូនប្រេងសាំងចេញពីឃ្លាំងដែលមានជញ្ជាំងផ្ទាល់ខ្លួននិងស្ថានីយ៍ប្រេងឥន្ធនៈរបស់ខ្លួនមួយកន្លែងនៅជិតផ្លូវចូលទៅកោះព្រាប ចំណុចទំនប់រលក សង្កាត់លេខ១ ក្រុងព្រះសីហនុ។ កន្លែងឃ្លាំងស្តុកប្រេងសាំងរបស់ឧកញ៉ា ទៀ វិចិត្រ គឺមានចម្ងាយប្រមាណ១០០ម៉ែត្រប៉ុណ្ណោះពីស្នាក់ការគយទំនប់រលក ប៉ុន្តែគ្មានសមត្ថកិច្ចគយឬសមត្ថកិច្ចពាក់ពន្ធណាហ៊ានប៉ះពាល់ឧកញ៉ា ទៀ វិចិត្រ នោះទេព្រោះគេបានដឹងច្បាស់ពីឥទ្ធិពលខ្លាំងក្លារបស់ឈ្មួញរូបនេះ។
ប្រភពពីមន្ត្រីគយនិងភ្នាក់ងារគយមួយចំនួន ព្រមទាំងសមត្ថកិច្ចពាក់ព័ន្ធក្នុងខេត្តព្រះសីហនុ បានឲ្យដឹងថា មួយរយៈពេលចុងក្រោយនេះឧកញ៉ា ទៀ វិចិត្រ ដែលមានខ្នងបង្អែករឹងមាំកំពុងសម្រុកនាំចូលប្រេងសាំងគេចពន្ធមកលក់ចែកចាយក្នុងខេត្តព្រះសីហនុ កាន់តែច្រើនឡើងៗ។ ប្រភពបានឲ្យដឹងទៀតថាឧកញ៉ា ទៀ វិចិត្រ គឺជាកូនប្រុសរបស់លោក ទៀ វិញ មេបញ្ជាការកងទ័ពជើងទឹក និងជាក្មួយប្រុសរបស់លោក ទៀ បាញ់ រដ្ឋមន្ត្រីក្រសួងការពារជាតិ ដូច្នេះហើយទើបគ្មានសមត្ថកិច្ចណាហ៊ានប៉ះពាល់ឧកញ៉ា ទៀ វិចិត្រ ឡើយ។ ផ្ទុយទៅវិញមានមន្ត្រីជំនាញនិងសមត្ថកិច្ចពាក់ព័ន្ធមួយចំនួន គឺជាអ្នកឃុបឃិតឲ្យឧកញ៉ា ទៀ វិចិត្រ ដើម្បីជាថ្នូរនឹងផលប្រយោជន៍យ៉ាងសុខស្រួល។
បើតាមការបង្ហើបពីមន្ត្រីគយក្នុងខេត្តព្រះសីហនុ មួយចំនួនបានឲ្យដឹងថា បច្ចុប្បន្ននេះឧកញ៉ា ទៀ វិចិត្រ នាំចូលប្រេងសាំងគេចពន្ធតាមច្រកកំពង់ផែ ៣កន្លែងនៅខេត្តព្រះសីហនុ គឺច្រកទំនប់រលក និងច្រកកំពង់ផែផ្សេងៗទៀត។ ប្រភពបានឲ្យដឹងទៀតថា មន្ត្រីគយព្រមទាំងសមត្ថកិច្ចពាក់ព័ន្ធតាមបណ្ដាច្រកទាំងនេះ គឺជាអ្នកសម្របសម្រួលឲ្យឧកញ៉ា ទៀ វិចិត្រ ធ្វើអ្វីៗតាមអំពើចិត្តព្រោះពួកគេមិនហ៊ានប៉ះពាល់ឧកញ៉ា ទៀ វិចិត្រ នោះឡើយ។ ដោយសារអាងមានខ្នងបង្អែករឹងមាំបែបនេះហើយទើបឧកញ៉ា ទៀ វិចិត្រ មិនញញើតក្នុងការនាំចូលប្រេងសាំងគេចពន្ធ តាមអំពើចិត្តហើយសូម្បីតែមន្ត្រីគយលើផ្ទៃសមុទ្រនិងសមត្ថកិច្ចពាក់ព័ន្ធលើផ្ទៃសមុទ្រ ក៏ត្រូវមានការយោគយល់ដល់ឧកញ៉ា ទៀ វិចិត្រ ផងដែរ។
ប្រភពដែលស្និទ្ធនឹងឧកញ៉ា ទៀ វិចិត្រ បានឲ្យដឹងថា បច្ចុប្បន្នឧកញ៉ា ទៀ វិចិត្រ ព្រមទាំងក្មួយប្រុសឈ្មោះ ឌី កំពុងសម្រុកនាំប្រេងសាំងគេចពន្ធនិងទំនិញគេចពន្ធច្រើនប្រភេទចូលតាមច្រកទំនប់រលក និងច្រកផ្សេងៗទៀតយ៉ាងរលូន។ ប្រភពបានឲ្យដឹងទៀតថា សមត្ថកិច្ចគ្រប់ស្ថាប័នក្នុងខេត្តព្រះសីហនុ គ្រាន់តែឮឈ្មោះឧកញ៉ា ទៀ វិចិត្រ គឺពួកគេមិនហ៊ានក្អកជាមួយឡើយព្រោះឧកញ៉ា ម្នាក់នេះមានឪពុកឈ្មោះ ទៀ វិញ ជាមេបញ្ជាការកងទ័ពជើងទឹក ហើយមានបងប្រុសឈ្មោះ ទៀ សុខា ជាមេបញ្ជាការរងកងទ័ពជើងទឹក។ លើសនេះទៅទៀតឧកញ៉ា ទៀ វិចិត្រ មានអ៊ុំប្រុសឈ្មោះ ទៀ បាញ់ ជាឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ដែលជាបង្អែករឹងមាំធ្វើឲ្យមន្ត្រីជំនាញនិងសមត្ថកិច្ចក្នុងខេត្តព្រះសីហនុ ញាក់សាច់ញាក់ឆ្អឹងគ្រប់ៗគ្នា។(មានត)
