សេចក្ដីរាយការណ៍ពីប្រជាពលរដ្ឋបានឲ្យដឹងថា បច្ចុប្បន្នសង្វៀនបញ្ជល់មាន់ក្នុងចំការកៅស៊ូភូមិខ្សាត់ កំពុងដំណើរការយ៉ាងរលូន ហើយមានអ្នកចូលរួមលេងមកពីគ្រប់ទិសទីដោយអ្នកខ្លះជិះរថយន្តទំនើបៗចូលមកលេងជាប្រចាំតែម្តង។ ទន្ទឹមនឹងនេះក៏មានអ្នកញៀនល្បែងបញ្ជល់មាន់ជិះម៉ូតូជាច្រើនគ្រឿងចូលមកលេងល្បែងបញ្ជល់មាន់ក្នុងចំការកៅស៊ូភូមិខ្សាត់ ព្រោះមេប៉ុស្ដិ៍នគរបាលរដ្ឋបាលឃុំតាម៉ៅ និងមេឃុំតាម៉ៅ ស្រុកព្រែកប្រសព្វ មិនចាត់វិធានការទប់ស្កាត់ឡើយ។ មានការសង្ស័យថា លោក ចាន់ សុផល្លា អធិការនគរបាលស្រុកព្រែកប្រសព្វ និងអភិបាលស្រុកព្រែកប្រសព្វ ទទួលបានផលប្រយោជន៍ពីម្ចាស់សង្វៀនបញ្ជល់មាន់នៅក្នុងចំការកៅស៊ូភូមិខ្សាត់ ផងដែរទើបនាំគ្នាសម្ងំស្ងៀមធ្វើមិនដឹងមិនឮអ្វីទាំងអស់។
សេចក្ដីរាយការណ៍ពីប្រជាពលរដ្ឋក្នុងភូមិខ្សាត់ បានឲ្យដឹងទៀតថា មួយរយៈចុងក្រោយនេះសង្វៀនបញ្ជល់មាន់ក្នុងមូលដ្ឋានពួកគាត់មានអ្នកចូលរួមលេងកាន់តែច្រើនឡើងៗដោយក្នុងការបញ្ជល់មាន់មួយគូៗមានដាក់ដើមថាន់រាប់លានរៀលឬរាប់ពាន់ដុល្លារ ហើយមានអ្នកចាញ់អស់លុយ អស់ទ្រព្យសម្បត្តិជាបន្តបន្ទាប់។
ប្រភពពីប្រជាពលរដ្ឋក្នុងភូមិខ្សាត់ ឃុំតាម៉ៅ ស្រុកព្រែកប្រសព្វ បានឲ្យដឹងថា នៅចំការកៅស៊ូមួយកន្លែងក្នុងមូលដ្ឋានមានគេបើកសង្វៀនបញ្ជល់មាន់យ៉ាងរលូនដោយគ្មានមន្ត្រីអាជ្ញាធរនិងសមត្ថកិច្ចមូលដ្ឋានចាត់វិធានការទប់ស្កាត់ឡើយ។ សូម្បីតែលោក ចាន់ សុផល្លា អធិការនគរបាលស្រុកព្រែកប្រសព្វ ក៏រក្សាភាពស្ងៀមស្ងាត់ដែរបណ្ដោយឲ្យល្បែងស៊ីសងកើតឡើងយ៉ាងរាលដាលប៉ះពាល់ដល់សន្តិសុខសង្គម។ ហេតុនេះហើយទើបប្រជាពលរដ្ឋក្នុងមូលដ្ឋានភូមិខ្សាត់ ឃុំតាម៉ៅ ស្រុកព្រែកប្រសព្វ អំពាវនាវឲ្យលោកឧត្តមសេនីយ៍ លន់ សុផាត ស្នងការនគរបាលខេត្តក្រចេះ និងលោក វ៉ា ថន អភិបាលខេត្តក្រចេះ ចាត់វិធានការបង្ក្រាបល្បែងស៊ីសងក្នុងមូលដ្ឋានពួកគាត់ជាបន្ទាន់ដើម្បីពង្រឹងសន្តិសុខសង្គមឲ្យស្របទៅតាមគោលនយោបាយភូមិ-ឃុំ មានសុវត្ថិភាពទាំង៩ចំណុច។
ប្រជាពលរដ្ឋបានឲ្យដឹងថា សង្វៀនបញ្ជល់មាន់នោះបើកលេងចាប់ពីថ្ងៃត្រង់ដល់ល្ងាចព្រោះជាកន្លែងលេងល្បែងស៊ីសងប្រកបដោយសុវត្ថិភាពបំផុតគ្មានការរំខានពីមន្ត្រីអាជ្ញាធរនិងសមត្ថកិច្ចមូលដ្ឋាននោះទេ។ ដោយសារមានសេចក្ដីព្រួយបារម្ភពីបញ្ហាអសន្តិសុខសង្គមទើបប្រជាពលរដ្ឋអំពាវនាវឲ្យលោក លន់ សុផាត ស្នងការនគរបាលខេត្តក្រចេះ និងលោក វ៉ា ថន អភិបាលខេត្តក្រចេះ ពិនិត្យមើលភាពអសកម្មរបស់មន្ត្រីនគរបាលនិងមន្ត្រីអាជ្ញាធរមូលដ្ឋានក្នុងស្រុកព្រែកប្រសព្វ ជាបន្ទាន់ព្រោះពួកគេកំពុងបណ្ដោយឲ្យល្បែងស៊ីសងខុសច្បាប់កើតឡើងយ៉ាងរាលដាលក្នុងឃុំតាម៉ៅ ហើយមិនចាត់វិធានការបង្ក្រាប។បឋម
