ប្រភពពីបុគ្គលិកនៅក្នុងសណ្ឋាគារអង្គរអេរ៉ា បានបង្ហើបឲ្យដឹងថា ម្ចាស់សណ្ឋាគារអង្គរអេរ៉ា បានរកស៊ីប្រមូល ទិញឈើ ប្រណីតស្តុកទុកនិងលក់ចែកចាយ ច្រើនឆ្នាំមកហើយមិនដែល មានមន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធណា ចាត់វិធានការបង្ក្រាបឡើយ។ ប្រភពខ្លះបានបង្ហើបឲ្យដឹងថា ប្រហែលលោក ម៉ុង ប៊ុនលីម មេរដ្ឋបាលព្រៃឈើខេត្តសៀមរាប និងលោក ទា គឹមសុទ្ធ នាយខណ្ឌរដ្ឋបាលព្រៃឈើខេត្តសៀមរាប ចាត់ទុកឈ្មួញឈ្មោះ ស៊ីណា ម្ចាស់សណ្ឋាគារអង្គរអេរ៉ា ជាប្រភពចំណូលរបស់ពួកគេទើបពួកគេបណ្ដោយឲ្យឈ្មួញឈ្មោះ ស៊ីណា ប្រមូលទិញឈើប្រណីតនិងស្តុកឈើប្រណីតយ៉ាងច្រើនដោយគ្មានញញើតអ្វីឡើយ។ បញ្ហានេះគឺជារឿងដែលលោក វេង សាខុន រដ្ឋមន្ត្រីក្រសួងកសិកម្ម និងលោក កែវ អូម៉ាលីស្ស ប្រធានរដ្ឋបាលព្រៃឈើនៃក្រសួងកសិកម្ម មិនគួរមើលរំលងតទៅទៀតទេព្រោះម្ចាស់សណ្ឋាគារអង្គរអេរ៉ា ឈ្មោះ ស៊ីណា គឺជាឈ្មួញល្បីខាងជួញដូរឈើប្រណីតយ៉ាងធំនៅក្នុងខេត្តសៀមរាប ច្រើនឆ្នាំមកហើយ។
ប្រភពពីមន្ត្រីនៅក្នុងមន្ទីរកសិកម្មខេត្តសៀមរាប បានឲ្យដឹងថា បច្ចុប្បន្ននៅក្នុងបរិវេណសណ្ឋាគារអង្គរអេរ៉ា បានក្លាយទៅជាទីតាំងប្រមូលទិញឈើប្រណីតនិងស្តុកឈើប្រណីតទ្រង់ទ្រាយធំដោយសារមានការឃុបឃិតពីសំណាក់មន្ត្រីពុករលួយ។ ប្រភពបានឲ្យដឹងទៀតថា ម្ចាស់សណ្ឋាគារអង្គរអេរ៉ា ឈ្មោះ ស៊ីណា ដែលជាមន្ត្រីក្នុងអង្គភាពប្រឆាំងអំពើពុករលួយផងនោះ កំពុងក្លាយទៅជាឈ្មួញប្រមូលទិញឈើស្តុកឈើទុកលក់យ៉ាងគឃ្លើនគ្មានញញើតអ្វីទាំងអស់។ ចំណែកលោក ម៉ុង ប៊ុនលីម នាយខណ្ឌរដ្ឋបាលព្រៃឈើខេត្តសៀមរាប និងលោក ទា គឹមសុទ្ធ ប្រធានមន្ទីរកសិកម្មខេត្តសៀមរាប ទំនងជាទទួលបានផលប្រយោជន៍យ៉ាងច្រើនពីម្ចាស់សណ្ឋាគារអង្គរអេរ៉ា ឈ្មោះ ស៊ីណា ទើបបណ្ដោយឲ្យឈ្មួញឈើរូបនេះធ្វើអ្វីៗតាមអំពើចិត្ត។
ប្រភពពីសមត្ថកិច្ចពាក់ព័ន្ធបានឲ្យដឹងថា ស្ទើរជារៀងរាល់ថ្ងៃរាល់យប់តែងតែមានរថយន្តពាក់ស្លាកលេខយោធានិងរថយន្តច្រើនប្រភេទដឹកជញ្ជូនឈើចូលតាមច្រកផ្លូវខាងក្រោយសណ្ឋាគារអង្គរអេរ៉ា ដើម្បីទម្លាក់ឈើនិងមានសន្តិសុខការពារយ៉ាងរឹងមាំទៀតផង។ ប្រភពបានឲ្យដឹងទៀតថា លោក ម៉ុង ប៊ុនលីម នាយខណ្ឌរដ្ឋបាលព្រៃឈើខេត្តសៀមរាប និងលោក ទា គឹមសុទ្ធ ប្រធានមន្ទីរកសិកម្មខេត្តសៀមរាប បានដឹងយ៉ាងច្បាស់រឿងឈ្មួញឈ្មោះ ស៊ីណា ប្រមូលទិញឈើប្រណីតស្តុកទុកក្នុងទីតាំងសណ្ឋាគារអង្គរអេរ៉ា ប៉ុន្តែគ្មានមន្ត្រីជំនាញឬសមត្ថកិច្ចពាក់ព័ន្ធណាហ៊ានប៉ះពាល់ឈ្មួញរូបនោះឡើយ។ ហេតុនេះហើយទើបឈ្មួញឈ្មោះ ស៊ីណា ដែលជាថៅកែសណ្ឋាគារអង្គរអេរ៉ា ក្លាយជាឈ្មួញជួញដូរឈើប្រណីតដ៏ធំនៅក្នុងខេត្តសៀមរាប ដោយសារឈ្មួញរូបនេះមានខ្នងបង្អែករឹងមាំនិងមានមន្ត្រីរដ្ឋបាលព្រៃឈើក្នុងខេត្តសៀមរាប ជួយសម្របសម្រួលផងដែរ។បឋម
