តាមប្រភពដែលស្និទ្ធនឹង លោក ហ៊ាល ទូច ប្រធានសាខាគយខេត្តកំពង់ឆ្នាំង បានឲ្យដឹងថា ទោះបីឈ្មួញ ប្រើប្រាស់រថ យន្តធំៗដឹកទំនិញគេចពន្ធ និងទំនិញបង់ពន្ធមិនគ្រប់យ៉ាងណាក៏ដោយ ក៏មិនដែលឃើញលោក ហ៊ាល ទូច ចាត់ វិធាន ការបង្ក្រាបនោះទេ។ ផ្ទុយទៅវិញឲ្យ តែឈ្មួញបង់លុយតាមការកំណត់ គឺរថយន្តធំៗដឹកទំនិញ គេចពន្ធ ទំនិញបង់ ពន្ធមិនគ្រប់ ឬទំនិញខុសច្បាប់អាចបើកបរឆ្លងកាត់មុខស្នាក់ការសាខាគយខេត្តកំពង់ឆ្នាំង យ៉ាងរលូន។ ប្រភពបានឲ្យដឹងទៀតថា តាមរយៈអំពើពុករលួយច្រើនបែបច្រើនយ៉ាង គឺលោក ហ៊ាល ទូច អាចប្រមូលលុយបានយ៉ាងច្រើនក្នុងមួយខែៗ ហើយក្រុមឈ្មួញអាចដឹកជញ្ជូនទំនិញគេចពន្ធ ទំនិញខុសច្បាប់ និងទំនិញបង់ពន្ធមិនគ្រប់ឆ្លងកាត់ខេត្តកំពង់ឆ្នាំង យ៉ាងសុខស្រួល។ បញ្ហានេះគឺជារឿងដែលថ្នាក់ដឹកនាំក្រសួងហិរញ្ញវត្ថុ ក៏ដូចជាមេគយធំៗក្នុងអគ្គនាយកដ្ឋានគយនិងរដ្ឋាករកម្ពុជា មិនគួរបណ្ដែតបណ្ដោយតទៅទៀតទេព្រោះអំពើពុករលួយរបស់លោក ហ៊ាល ទូច មេគយខេត្តកំពង់ឆ្នាំង ព្រមទាំងបក្ខពួកកំពុងធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនក្នុងមួយខែៗ។
ប្រភពពីមន្ត្រីគយនិងភ្នាក់ងារគយក្នុងខេត្តកំពង់ឆ្នាំង មួយចំនួនបានបង្ហើបឲ្យដឹងថាលោក ហ៊ាល ទូច ប្រធានសាខាគយខេត្តកំពង់ឆ្នាំង និងបក្ខពួកមួយចំនួនតូចកំពុងឃុបឃិតគ្នាគាបយកលុយពីក្រុមឈ្មួញដឹកជញ្ជូនទំនិញឆ្លងកាត់ផ្លូវជាតិលេខ៥ ក្នុងខេត្តកំពង់ឆ្នាំង។ ប្រភពបានឲ្យដឹងទៀតថា ឈ្មួញដែលដឹកជញ្ជូនទំនិញតាមរថយន្តធំៗ តាមរថយន្តសាំយ៉ុង និងរថយន្តប្រភេទផ្សេងៗទៀតត្រូវបង់លុយឲ្យលោក ហ៊ាល ទូច តាមការកំណត់បើទោះបីទំនិញទាំងនោះបង់ពន្ធគយនៅច្រកព្រំដែនរួចរាល់យ៉ាងណាក៏ដោយ។ ឥឡូវនេះរឿងអាស្រូវពុករលួយរបស់លោក ហ៊ាល ទូច និងបក្ខពួកកំពុងត្រូវបានលាតត្រដាងជាសាធារណៈដើម្បីឲ្យលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏ដូចជាមេគយធំៗក្នុងអគ្គនាយកដ្ឋានគយនិងរដ្ឋាករ ចាត់វិធានការទប់ស្កាត់ជាបន្ទាន់.។
ប្រភពពីឈ្មួញមួយចំនួនបានឲ្យដឹងថា នៅពេលពួកគាត់ដឹកទំនិញឬផ្លែឈើតាមរថយន្តសាំយ៉ុងពីច្រកព្រំដែនក្នុងខេត្តប៉ៃលិន ខេត្តបាត់ដំបង និងខេត្តបន្ទាយមានជ័យ ឆ្លងកាត់ផ្លូវជាតិលេខ៥ ខេត្តកំពង់ឆ្នាំង ត្រូវបង់លុយឲ្យសមត្ថកិច្ចគយខេត្តកំពង់ឆ្នាំង ក្នុងមួយរថយន្តចាប់ពី៨ទៅ១០ម៉ឺនរៀលដោយគ្មានបង្កាន់ដៃឬវិក្កយបត្រអ្វីទេ។ ក្នុងមួយយប់ៗមានរថយន្តសាំយ៉ុងដឹកផ្លែឈើនិងដឹកទំនិញផ្សេងៗពី៨០ទៅជាង១០០គ្រឿង ដូច្នេះលោក ហ៊ាល ទូច ប្រធានសាខាគយខេត្តកំពង់ឆ្នាំង និងបក្ខពួកប្រមូលលុយបានមិនតិចឡើយ។ ចំណែកម្ចាស់រថយន្តដឹកទំនិញធំៗទោះបីទំនិញបង់ពន្ធត្រឹមត្រូវនិងទំនិញបង់ពន្ធមិនគ្រប់ គឺត្រូវបង់លុយឲ្យលោក ហ៊ាល ទូច និងបក្ខពួកក្នុងមួយជើងពី១០០ដុល្លារទៅ៣០០ដុល្លារ ហើយក្នុងមួយថ្ងៃមានរថយន្តធំៗដឹកទំនិញរាប់សិបគ្រឿងឆ្លងកាត់មុខស្នាក់ការគយខេត្តកំពង់ឆ្នាំង ដែលជាប្រភពចំណូលដ៏ធំរបស់លោក ហ៊ាល ទូច និងបក្ខពួកតែម្តង។(មានត)
