ប្រភពពីឈ្មួញជាច្រើននាក់បានឲ្យដឹងថា មានរថយន្តធំៗដឹកទំនិញឈប់បន្តក ន្ទុយគ្នាចូលបង់លុយឲ្យមនុស្ស ប្រចាំស្ថានីយ៍ ជញ្ជីងថ្លឹងរថយន្តលើផ្លូវជាតិលេខ៥ ភូមិកូនដំរី សង្កាត់និមិត្ត ក្រុងប៉ោយប៉ែត ជារៀងរាល់ ថ្ងៃហើយមិន ឃើញ រថយន្តទាំងនោះឡើងថ្លឹងលើជញ្ជីងឲ្យ បានត្រឹមត្រូវនោះឡើយ។ ម្ចាស់រថយន្តដឹក ជញ្ជូនទំនិញធំៗ ត្រូវតែបង់លុយ តាមការកំណត់បើចង់ចៀសផុតពី ការរំខាននានា ហើយសូម្បីតែផ្លូវជាតិលេខ៥ ចំណុចស្ថានីយ៍ ជញ្ជីងថ្លឹងរថយន្តភូមិកូនដំរី ក៏កំពុងស្រុតខូចជាបណ្ដើរៗផងដែរដោយមិនទាន់ឃើញមន្ទីរសាធារណការនិងដឹកជញ្ជូនខេត្តបន្ទាយមានជ័យ ជួសជុលនៅឡើយទេ។ មន្ត្រីនៅក្នុងមន្ទីរសាធារណការខេត្តបន្ទាយមានជ័យ បានឲ្យដឹងថា ការដែលក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តភូមិកូនដំរី អាចប្រែជញ្ជីងថ្លឹងរថយន្តឲ្យក្លាយជាជញ្ជីងថ្លឹងលុយទាំងបាវៗក្នុងមួយថ្ងៃៗ គឺដោយសារមានការឃុបឃិតបើកដៃពីសំណាក់លោក គឹម សុវណ្ណ ប្រធានមន្ទីរសាធារណការខេត្តបន្ទាយមានជ័យ។ ដូច្នេះលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន គួរពិនិត្យមើលភាពអសកម្មនិងអំពើពុករលួយរបស់លោក គឹម សុវណ្ណ ប្រធានមន្ទីរសាធារណការខេត្តបន្ទាយមានជ័យ ផងដែរព្រោះបើគ្មានការឃុបឃិតបើកដៃពីសំណាក់លោក គឹម សុវណ្ណ ទេនោះគឺក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តចំណុចភូមិកូនដំរី មិនហ៊ានធ្វើអ្វីៗតាមអំពើចិត្តដូចសព្វថ្ងៃនេះឡើយ។
ប្រភពពីមន្ត្រីរាជការនៅក្នុងមន្ទីរសាធារណការនិងដឹកជញ្ជូនខេត្តបន្ទាយមានជ័យ មួយចំនួនបានអំពាវនាវឲ្យលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន ពិនិត្យមើលទង្វើមិនប្រក្រតីនិងអំពើពុករលួយរបស់ក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តនៅចំណុចភូមិកូនដំរី ផ្លូវជាតិលេខ៥ សង្កាត់និមិត្ត ក្រុងប៉ោយប៉ែត ជាបន្ទាន់។ ដោយហេតុថាបច្ចុប្បន្នឈ្មួញបានប្រើប្រាស់រថយន្តធុនធំផ្ទុកទំនិញលើសទម្ងន់ដឹកជញ្ជូនឆ្លងកាត់មុខស្ថានីយ៍ជញ្ជីងថ្លឹងរថយន្តភូមិក្បាលដំរី ផ្លូវជាតិលេខ៥ យ៉ាងរលូនដោយគ្រាន់តែបង់លុយតាមការកំណត់របស់ក្រុមមន្ត្រីប្រចាំស្ថានីយ៍នេះតែប៉ុណ្ណោះ។ ការដែលក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តភូមិកូនដំរី ហ៊ានធ្វើអ្វីៗតាមអំពើចិត្តគឺមានការឃុបឃិតបើកដៃពីសំណាក់ប្រធានមន្ទីរសាធារណការនិងដឹកជញ្ជូនខេត្តបន្ទាយមានជ័យ ផងដែរទើបអ្វីៗអាចប្រព្រឹត្តទៅដោយរលូន។
ប្រភពពីក្រុមឈ្មួញនិងក្រុមអាជីវករដែលដឹកជញ្ជូនទំនិញតាមរថយន្តធំៗឆ្លងកាត់ស្ថានីយ៍ជញ្ជីងថ្លឹងរថយន្តលើផ្លូវជាតិលេខ៥ ក្នុងភូមិកូនដំរី បានឲ្យដឹងថា ទោះបីពួកគេផ្ទុកទំនិញលើសទម្ងន់ឬមិនលើសទម្ងន់ក៏ត្រូវបង់លុយតាមការកំណត់របស់ក្រុមមន្ត្រីដែលឈរជើងប្រចាំស្ថានីយ៍ជញ្ជីងថ្លឹងរថយន្តនោះដែរ។ ប្រភពបានឲ្យដឹងទៀតថា រថយន្តធំៗដែលដឹកជញ្ជូនទំនិញឆ្លងកាត់ស្ថានីយ៍ជញ្ជីងថ្លឹងរថយន្តនោះ ត្រូវបង់លុយក្នុងមួយរថយន្តចាប់ពី១០ម៉ឺនរៀលដល់៣០ម៉ឺនរៀល ហើយក្នុងមួយថ្ងៃៗមានរថយន្តច្រើនរយគ្រឿងបើកបរឆ្លងកាត់ ដូច្នេះក្រុមមន្ត្រីពុករលួយប្រមូលលុយបានមិនតិចនោះទេ។ ក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តភូមិកូនដំរី មិនខ្វល់រឿងឈ្មួញប្រើប្រាស់រថយន្តធំៗផ្ទុកលើសទម្ងន់ឬខុសលក្ខណៈបច្ចេកទេសអ្វីនោះទេ គឺឲ្យតែម្ចាស់រថយន្តបង់លុយតាមការកំណត់អាចបន្តដំណើរទៅមុខយ៉ាងរលូន។(មានត)
