ប្រភពពីប្រជាពលរដ្ឋក្នុងឃុំប៊ូស្រា ស្រុកពេជ្រាដា ខេត្តមណ្ឌលគិរី បានឲ្យដឹងថា លោក សំរិត ណយ មេនគរបាលប៉ុស្ដិ៍ ច្រកទ្វេភាគីណាំលៀ ហៅច្រកប៉ុស្ដិ៍៧ នៅតែបន្តឃុបឃិតឲ្យឈ្មួញដឹកជញ្ជូន ឈើតាមរថយន្តឡង់គ្រឺស័រ កែច្នៃ និង រថយន្តជាច្រើនប្រភេទចេញទៅស្រុកយួនយ៉ាងរលូន ជាពិសេសនៅពេលយប់។ មន្ត្រីពាក់ព័ន្ធនៅច្រកទ្វេភាគីណាំលលៀ ហៅច្រកប៉ុស្ដិ៍៧ បានឲ្យដឹងថា ឈ្មួញឈ្មោះ សារឿន ម៉ាប់ ឈ្មួញឈ្មោះ ឆុង និងឈ្មួញឈ្មោះ គួយ សុឃុន ដែលជាមន្ត្រីនគរបាលខេត្តមណ្ឌលគិរី ហើយជាប្អូនប្រុសលោក ស្វាយ សំអ៊ាង អភិបាលខេត្តមណ្ឌលគិរី សម្រុកដឹកជញ្ជូនឈើចេញតាមច្រកប៉ុស្ដិ៍៧ យ៉ាងពេញបន្ទុកតែម្តង។ ការដែលឈ្មួញឈ្មោះ សារឿន ម៉ាប់ និងឈ្មួញឈ្មោះ គួយ សុឃុន អាចដឹកជញ្ជូនឈើចេញទៅស្រុកយួនតាមច្រកប៉ុស្ដិ៍៧យ៉ាងរលូន គឺដោយសារពួកគេអាងមានខ្នងបង្អែករឹងមាំ។
បើតាមការកត់សម្គាល់របស់សមត្ថកិច្ចពាក់ព័ន្ធនៅក្នុងខេត្តមណ្ឌលគិរី បានឲ្យដឹងថា រយៈពេលមួយខែកន្លងទៅនេះឈ្មួញសម្រុកដឹកឈើពីខេត្តមណ្ឌលគិរី ចេញទៅស្រុកយួនតាមរថយន្តធុនធំនិងរថយន្តធុនតូចសរុបរាប់ពាន់គ្រឿង។ ក្នុងនោះឈ្មួញដែលដឹកជញ្ជូនឈើចេញទៅស្រុកយួនតាមច្រកទ្វេភាគីដាក់ដាំ ស្រុកអូររាំង ច្រកទ្វេភាគីណាំលៀ ហៅប៉ុស្ដិ៍៧ ស្រុកពេជ្រាដា និងច្រកឡាប៉ាខេ ស្រុកកែវសីមា សុទ្ធតែមានខ្នងបង្អែករឹងមាំនិងមានការឃុបឃិតពីសមត្ថកិច្ចនៅច្រកព្រំដែន។ ដូច្នេះថ្នាក់ដឹកនាំក្រសួងមហាផ្ទៃ និងនាយឧត្តមសេនីយ៍ នេត សាវឿន អគ្គស្នងការនគរបាលជាតិ មិនគួរបណ្ដែតបណ្ដោយតទៅទៀតទេ ព្រោះសមត្ថកិច្ចនគរបាលប្រចាំច្រកទ្វេភាគី៣កន្លែងក្នុងខេត្តមណ្ឌលគិរី នៅតែឃុបឃិតឲ្យឈ្មួញដឹកជញ្ជូនឈើចេញទៅស្រុកយួនយ៉ាងរលូនដោយគ្មានញញើតអ្វីទាំងអស់។
មន្ត្រីរាជការនិងប្រជាពលរដ្ឋក្នុងខេត្តមណ្ឌលគិរី បានរំលឹកថា កន្លងមកលោក ស្វាយ សំអ៊ាង អភិបាលខេត្តមណ្ឌលគិរី បានដាក់ចេញនូវបទបញ្ជាដើម្បីបង្ក្រាបនិងទប់ស្កាត់បទល្មើសព្រៃឈើប្រកបដោយប្រសិទ្ធភាព។ ក៏ប៉ុន្តែជាក់ស្ដែងបច្ចុប្បន្នឈ្មួញធំៗនៅតែបន្តសកម្មភាពកាប់ឈើនិងដឹកជញ្ជូនឈើពីខេត្តមណ្ឌលគិរី ចេញទៅស្រុកយួនយ៉ាងពេញបន្ទុកដោយគ្មានញញើតអ្វីឡើយ ដែលជាហេតុធ្វើឲ្យព្រៃឈើក្នុងស្រុកកោះញែក ស្រុកកែវសីមា ស្រុកអូររាំង និងស្រុកពេជ្រាដា កំពុងប្រឈមនឹងសេចក្ដីវិនាស។
ប្រភពពីមន្ត្រីអង្គការក្រៅរដ្ឋាភិបាលនិងសកម្មជនព្រៃឈើក្នុងខេត្តមណ្ឌលគិរី បានឲ្យដឹងថា បច្ចុប្បន្នមេឈ្មួញ សឹង សំអុល មេឈ្មួញ តុប វីដា និងឈ្មួញមួយចំនួនទៀតនៅតែសម្រុកកាប់ឈើដឹកជញ្ជូនឈើពីស្រុកកោះញែក ចេញទៅស្រុកយួនតាមច្រកព្រំដែនក្នុងស្រុកស្នួល ខេត្តក្រចេះ ។ សកម្មភាពរបស់ឈ្មួញធំៗក្នុងការដឹកជញ្ជូនឈើចេញទៅស្រុកយួនមិនដែលមានមន្ត្រីជំនាញឬសមត្ថកិច្ចពាក់ព័ន្ធណាចាត់វិធានការទប់ស្កាត់ឡើយ ហើយមន្ត្រីជំនាញនិងសមត្ថកិច្ចពាក់ព័ន្ធគិតតែពីរឿងផលប្រយោជន៍ផ្ទាល់ខ្លួនប៉ុណ្ណោះ។ ដូច្នេះហើយទើបមេឈ្មួញ សឹង សំអុល និងមេឈ្មួញ តុប វីដា នៅតែបន្តសកម្មភាពកាប់ឈើដឹកជញ្ជូនឈើពីស្រុកកោះញែក ចេញទៅស្រុកយួនដោយគ្មានញញើតអ្វីទាំងអស់។ ជាងនេះទៅទៀតតាមច្រកទ្វេភាគីទាំង៣កន្លែងក្នុងខេត្តមណ្ដលគិរី គឺច្រកដាក់ដាំ ច្រកណាំលៀ ហៅច្រកប៉ុស្ដិ៍៧ និងច្រកឡាប៉ាខេ មានឈ្មួញដឹកជញ្ជូនឈើចេញទៅស្រុកយួនយ៉ាងពេញបន្ទុក ជាពិសេសនៅពេលយប់។បឋម
