ប្រភពពីមន្ត្រីមន្ទីរកសិកម្ម ខេត្តរតនគិរី ក៏បានឲ្យដឹងដែរថា មេរដ្ឋបាលព្រៃឈើខេត្តរតនគិរី លោក កែប កត់ មិនហ៊ានប៉ះពាល់ ឈ្មួញ ណាប់ វណ្ណៈ និងឈ្មួញឈ្មោះ ហូវ ជីវ៉ៃ ដែលល្បីល្បាញខាង ដឹកជញ្ជូនឈើចេញ ទៅស្រុកយួនតាម ច្រកទ្វារអន្តរជាតិអូរយ៉ាដាវ ច្រករបៀង១៩ និងច្រករបៀងផ្សេងៗទៀតនោះទេ។ ផ្ទុយទៅវិញលោក កែប កត់ នាយខណ្ឌរដ្ឋបាលព្រៃឈើខេត្តរតនគិរី ត្រូវបានគេដឹងថាជាអ្នកសម្របសម្រួលឲ្យឈ្មួញ ណាប់ វណ្ណៈ និងឈ្មួញឈ្មោះ ហូវ ជីវ៉ៃ បង្កើនសកម្មភាពដឹកជញ្ជូនឈើចេញទៅស្រុកយួនយ៉ាងពេញបន្ទុកដើម្បីជាថ្នូរនឹងផលប្រយោជន៍។ លើសនេះទៅទៀតលើផ្លូវជាតិលេខ៧៨ ពីក្រុងបានលុង ទៅកាន់ច្រកទ្វារអន្តរជាតិអូរយ៉ាដាវ មានប៉ុស្ដិ៍ត្រួតពិនិត្យរបស់សមត្ថកិច្ចពាក់ព័ន្ធរាប់សិបកន្លែង ក៏ប៉ុន្តែគ្មានសមត្ថកិច្ចណាហ៊ានប៉ះពាល់រថយន្តដឹកជញ្ជូនឈើរបស់ឈ្មួញ ណាប់ វណ្ណៈ និងឈ្មួញឈ្មោះ ហូវ ជីវ៉ៃ ទាល់តែសោះ។
មន្ត្រីអង្គការក្រៅរដ្ឋាភិបាលនិងសកម្មជនព្រៃឈើក្នុងខេត្តរតនគិរី បានឲ្យដឹងថា ដោយសារមានលោក គឹម រស្មី មេបញ្ជាការអាវុធហត្ថខេត្តរតនគិរី ជាបង្អែករឹងមាំទើបឈ្មួញ ណាប់ វណ្ណៈ និងឈ្មួញឈ្មោះ ហូវ ជីវ៉ៃ ហ៊ានបន្តសកម្មភាពដឹកជញ្ជូនឈើចេញទៅស្រុកយួនយ៉ាងគគ្រឹកគគ្រេងដូចសព្វថ្ងៃនេះ។ ដូច្នេះថ្នាក់ដឹកនាំកងរាជអាវុធហត្ថលើផ្ទៃប្រទេស មិនគួរបណ្ដែតបណ្ដោយតទៅទៀតទេ ព្រោះករណីលោក គឹម រស្មី មេបញ្ជាការអាវុធហត្ថខេត្តរតនគិរី ជាបង្អែករបស់ក្រុមឈ្មួញដឹកជញ្ជូនឈើទៅស្រុកយួនកំពុងធ្វើឲ្យប៉ះពាល់ដល់កេរ្តិ៍ឈ្មោះស្ថាប័នកងរាជអាវុធហត្ថលើផ្ទៃប្រទេសផងដែរ។ លើសនេះទៅទៀតដោយសារតែឈ្មួញធំៗបានយកលោក គឹម រស្មី ធ្វើជាបង្អែកសម្រាប់ដឹកជញ្ជូនឈើចេញទៅស្រុកយួនទើបបទល្មើសបំផ្លាញព្រៃឈើក្នុងស្រុកលំផាត់ ស្រុកកូនមុំ ស្រុកវ៉ើនសៃ ស្រុកអូរជុំ ស្រុកតាវែង ស្រុកអណ្ដូងមាស និងស្រុកអូរយ៉ាដាវ កើតឡើងកាន់តែខ្លាំងក្លាជាងមុនទៅទៀត។
ប្រភពពីមន្ត្រីអាវុធហត្ថនៅក្នុងខេត្តរតនគិរី មួយចំនួនបានឲ្យដឹងថា រហូតមកដល់ពេលនេះមានឈ្មួញមួយចំនួនបានយកលោកឧត្តមសេនីយ៍ត្រី គឹម រស្មី មេបញ្ជាការអាវុធហត្ថខេត្តរតនគិរី មកធ្វើជារបាំងដើម្បីដឹកជញ្ជូនឈើចេញទៅស្រុកយួនតាមច្រកទ្វារអន្តរជាតិអូរយ៉ាដាវ និងច្រករបៀងក្បែរៗនោះយ៉ាងរាលដាល។ ប្រភពបានឲ្យដឹងទៀតថា ឈ្មួញឈ្មោះ ណាប់ វណ្ណៈ ហៅណាក់ក្បាលធំ ដែលជាមន្ត្រីអាវុធហត្ថនិងឈ្មួញឈ្មោះ ហូវ ជីវ៉ៃ កំពុងបង្កើនសកម្មភាពដឹកជញ្ជូនឈើចេញទៅស្រុកយួនយ៉ាងគគ្រឹកគគ្រេងព្រោះគ្មានមន្ត្រីរដ្ឋបាលព្រៃឈើឬសមត្ថកិច្ចពាក់ព័ន្ធណាទប់ស្កាត់ឡើយ។ ផ្ទុយទៅវិញមន្ត្រីរដ្ឋបាលព្រៃឈើនិងសមត្ថកិច្ចពាក់ព័ន្ធមួយចំនួននាំគ្នាសម្ងំចាំទទួលផលប្រយោជន៍ពីឈ្មួញ ណាប់ វណ្ណៈ និងឈ្មួញឈ្មោះ ហូវ ជីវ៉ៃ យ៉ាងសុខស្រួលព្រោះដឹងថាឈ្មួញទាំង២នាក់នេះមានខ្នងបង្អែកយ៉ាងរឹងមាំ។មានត
